Перспектывы супрацоўніцтва ў барацьбе са злачыннасцю абмяркуюць у Мінску эксперты СНД

Пасяджэнне экспертнай групы па ўзгадненню праектаў дакументаў, якія датычацца супрацоўніцтва дзяржаў – удзельніц СНД у барацьбе са злачыннасцю і незаконным абаротам наркотыкаў, пройдзе 9-11 красавіка ў Выканаўчым камітэце СНД у Мінску. Аб гэтым карэспандэнту БЕЛТА паведамілі ў прэс-службе Выканкама СНД.

У прыватнасці, эксперты маюць намер абмеркаваць міждзяржаўную праграму сумесных мер барацьбы са злачыннасцю і праграму супрацоўніцтва ў барацьбе з незаконным абаротам наркатычных сродкаў, псіхатропных рэчываў і іх прэкурсораў і процідзеянні наркаманіі. Абодва дакументы разлічаны на перыяд з 2014 па 2018 гады. У праграмах прадугледжаны мерапрыемствы па развіццю міжнародна-прававой базы супрацоўніцтва краін Садружнасці, правядзенню сумесных прафілактычных, аператыўна-вышуковых мерапрыемстваў і спецаперацый, а таксама па ўзаемадзеянню ў падрыхтоўцы кадраў і павышэнні кваліфікацыі спецыялістаў, растлумачылі ў прэс-службе.

Пры распрацоўцы комплексу мер, прадугледжаных міждзяржпраграмай па барацьбе са злачыннасцю, улічваліся вынікі аналізу крымінагеннай сітуацыі, прагноз дынамікі злачыннасці, вопыт сумесных дзеянняў у барацьбе з ёй. У праекце праграмы супрацоўніцтва ў барацьбе з незаконным абаротам наркотыкаў былі ўлічаны стан, тэндэнцыі і дынаміка развіцця сітуацыі ў барацьбе з незаконным абаротам наркатычных сродкаў, псіхатропных рэчываў і іх прэкурсораў і процідзеянні наркаманіі як на тэрыторыях краін СНД, так і ў свеце. Акрамя таго, у аснову абодвух дакументаў былі пакладзены вынікі рэалізацыі папярэдніх аналагічных праграм.

Плануецца, што пасля канчатковага ўзгаднення экспертамі праекты праграм будуць ва ўстаноўленым парадку ўнесены на разгляд Савета кіраўнікоў дзяржаў СНД.